慕尼黑嘅奧林匹克公園，可以話見證咗德國近30年嘅體壇歷史。呢個原本喺拜仁慕尼黑嘅主場館，𠵱家已經畀新嘅安聯球場取代，咁係咪代表佢嘅任務已經完成呢？答案當然唔喺啦！
有線直擊隊早前採訪呢個奧林匹克公園，裏面依然有得吃喝玩樂，就算德國班霸已經唔喺呢度比賽，但球迷仍唔會忘記喺呢度嘅光輝歲月。奧林匹克公園72年主辦過奧運會，兩年後嘅74年世界盃決賽又喺呢度舉行；加上有拜仁曾經喺呢度擺擂台，難怪奧林匹克公園已成為德國人嘅體壇標記。

曾舉辦奧運及世界盃

世界盃期間，奧林匹克公園有一部份被劃成畀球迷睇大電視嘅FanFest，每逢有比賽呢度就一定人山人海。其次呢度有個室內5人足球賽場，好多人都鍾意嚟呢度踢吓波。如果以國際性大型比賽嘅場地設施嚟計，相信佢都算係首屈一指。至於主場館現時雖然冇用嚟比賽，但係好多大型演唱會都會選擇喺呢度舉行，貪佢地方大又可以容納大量觀眾。
除咗體育設施外，公園入面仲有一間寶馬車廠嘅博物館，啱晒鍾意車嘅朋友。裏面擺咗好多古董車，仲有齊詳盡資料介紹，車迷千祈唔好錯過。
法國對葡萄牙呢場準決賽已經打完，慕尼黑呢個城巿相信都已完成咗佢嘅任務。不過，若然香港朋友呢幾日仲到慕尼黑，不妨去奧林匹克公園嘅fanfest感受吓世界盃氣氛。
有線06世界盃嘉年華，將於7月8日晚11:00pm——午夜1:30am，播出世盃外景隊採訪滙報