美股上周五調整,杜指跌84點,港股會否跟隨,要視乎政府撤回23條立法後,投資者(特別係外資基金)的態度而定。
港股在升破11000大關後,明顯出現疲態,若借勢調整一下,未嘗不是好事。由於熱錢不斷湧入,即使調整,幅度亦不會大,調整後再上,仍有機會出現新高。不過,重複講一句,現時已係升浪尾聲,亦係最燦爛時刻,估計呢段時間會維持多2至3個禮拜,踏入10月,一定要小心。
近期紅籌當旺,外資同中資都有入市,佢哋策略唔係炒短,而係揸長,亦已計入有中期調整嘅因素;咁有信心,主要係紅籌升勢只係剛起步,日後調整幅度亦唔會大,但低位貨源疏,好難買夠貨,佢哋計平均價,第日調整完,話咁易就可以抽番上去。QDII最快年底出台,中資股係必選對象,下一個浪會升得更急。
今年業績料理想
紅籌股雖唔少,但除幾隻大價股外,較活躍嘅細價股只得10多隻,大價股外資買多,細價股則係中資寵物,特別係廣南(1203),近兩個禮拜,周時見有大行密密收集,呢隻股死過翻生,兼且復元得快,自己友上得車,計過度過,日後等食大茶飯。
廣南成功轉型,前年關閉超市業務,跟住收購馬口鐵廠,重點發展工業同前景較好、有競爭力嘅業務,去年營業額17.8億元,減2%,但獲利1.15億元,大增124.2%,每股獲利1.28仙。
03年度,盤數應該重靚,理由係:(1)內地馬口鐵罐需求急升,集團不斷進行技術改造,生產力同競爭力繼續提升;(2)開拓冰鮮肉類和高附加值飼料業務,提供全年盈利貢獻;(3)牲畜飼養改為出租或出售,不再帶來虧損;以及(4)贖回1.05億元可換股債券後,利息開支減少。
重有,廣南財況好健全,手上有現金2.43億元,資產淨值4.94億元,每股淨值0.55元,以佔8成盈利的工業股而言,股價冇理由大折讓67%!
廣南走勢正處於突破邊緣,家下在前高位水平整固,一衝破0.18元,新升浪再起,照度上去,目標係0.23元。
郭兆誠