韓國MBC王牌綜藝節目《無限挑戰》於2005年播出，今年已開播13年，日前已傳出因為靈魂人物兼導演金泰浩已於上月底正式離開節目，因為有新導演加入，令到《無限挑戰》將會作出大改革，當時已傳出《無限挑戰》嘅元老成員包括劉在錫、HaHa、朴明秀等都面臨被換。

而今日韓國傳媒就報道，《無限挑戰》嘅六位成員劉在錫、HaHa、朴明秀、鄭俊河、楊世炯及曹世鎬已鐵定全部下車，唔會繼續出演節目，當中今個31號喺節目最後一次播出後就會全員下車。據了解楊世炯及曹世鎬係後期加入，日前有晶二人將會留低,不過今日有指
曹世鎬為咗義氣，決定同成員一齊退出節目。

據了解，節目新導演將會負責第二季嘅《無限挑戰》，佢亦都確定咗所有成員都唔會留低，並計劃帶領新團隊製作節目。而MBC綜藝節目部部長今日會晤韓媒時，承認《無限挑戰》於本月31號播出最後一集作結第一季，但對於後續節目、節目會否開設第二季、劉在錫等人會否繼續主持就表示尚在討論中。而MBC相關人士就指全員下車並唔係事實，目前一切仍在討論中，並會努力游說成員留低。

對於《無限挑戰》驚爆播到月底成員將全部下車嘅消息，觀眾都大表可惜，唔少觀眾覺得冇咗劉在錫、HaHa等元祖成員喺節目，已經沒有意思，仲認為不用再製作新一季嘅《無限挑戰》，索性更換全新名字好過。

更多韓流，喺晒《娛果》
http://fb.com/appledailyent