新聞向來都係即日鮮，唔知仲有幾多人記得iProA事件。呢單發生喺2011年嘅「舊聞」，由政府前資訊科技總監葛輝大踢爆，指控政府喺「上網學習支援計劃」中，要交由親建制嘅互聯網專業協會（iProA）負責，成個招標程序亂晒龍，矛頭直指最高話事人財政司司長曾俊華。
呢單醜聞今日會再喺立法會資訊科技及廣播事務委員會討論，由iProA同小童群益會合組嘅信息共融基金會會長鄧淑明都會出席，政府官員亦唔少得。近日就流傳一份教議員喺今日會議上點樣問問題嘅清單，詳列八大問題，啲問題方向都係畀位iProA入，等佢可以抱不平。