【新增回應】

五月份嘅大事，當然就係五月天開演唱會啦，呢個演唱會同黃子華嘅最後一個棟篤笑一樣，都係一票難求，個個都會上網搵下有冇飛咁，但真係要小心，因為五月嘅五月天演唱會係有兩個...

咩叫兩個五月天演唱會？第一個就係台灣天團五月天，五月頭喺迪士尼開嘅戶外演唱會。第二個就叫做《五月天母親演唱會》，唔係話五月天嘅媽媽們嚟到開演唱會啊，而係荃灣海濱海灣居民協會搞嘅演唱會，大家千其唔到搞錯啊，一個喺迪士尼、一個喺荃灣大會堂啊！

其實《五月天母親演唱會》都唔係第一次搞，上年都有一個《鄒秉恬議員1/4世紀情懷暨五月天母親金曲演唱會》，上年嘅演唱者除咗有鄒秉恬議員之外，仲有李錦聯出場。而到咗今年，演唱者陣容變得更強，除咗有第二年出席嘅李錦聯，仲1 李龍基、葉凱茵、譚日康、白倩蘭同埋Jenny，咁當然會有鄒秉恬議員啦。

至於票價方面，分別有$480、$320、$180、$120、$80，最貴嗰張等於五月天士尼演唱會最平嗰張，仲相信一定唔使怕黃牛黨喇！所以話大家買五月天飛真係要睇清楚，一個唔小心買錯，唯有當請媽媽睇演唱會啦。

喺《五月天母親演唱會》掛頭牌嘅資深歌手李龍基，被問到有網友批評演唱會名抽水，基哥接受《蘋果》電話訪問表示：「老實講，每一個人都有個腦，鍾意點諗咪點諗，嘴係人哋嘅，佢要點講就點講，冇乜所謂，況且呢個唔係我嘅演唱會，我都係唱幾首歌啫，有好多人，唔係我一個人。」

基哥話自己冇諗撞名呢個問題，演唱會係荃灣議員鄒秉恬搞：「我同佢好熟嘅，佢話母親節嚟幫幫手，我話ok，如果我喺香港嘅話，年年都有幫佢，所以完全冇諗乜台灣同香港，五月天係名嚟啫嘛。」問到有冇興趣睇台灣天團五月天演唱會？基哥坦言：「可能我哋有代溝問題，自己未有咁嘅衝動去睇，同埋我哋主要廣東歌，佢哋國語歌，有少少分別。自己未定嗰晚唱乜嘢歌，除咗自己歌之外，喜歡嘅關正傑、葉振棠、譚詠麟都會唱。」

精選娛聞，喺晒《娛果》
http://fb.com/appledailyent