陳倩揚、蔡穎恩同香港首位男子花劍世青冠軍張家朗，今日喺科學園為海洋公園保育基金舉辦嘅《生態保衞賽》慈善跑擔任嘉賓。

懷孕近5個月嘅陳倩揚話：「咁就過咗一半，時間過得好快。日子過得好充實，又有好多新工作安排，接咗啲廣告、訪問同主持嘅工作，對於懷孕嘅媽媽嚟講，係一件好開心嘅事。」佢話工作已經排到生之前，有嬰兒產品同屋企產品。

問到陳倩揚腹中嘅新成員係仔定女？陳倩揚話：「下星期照結構，我都好想快啲知，因為要忍手唔添置嘢住，因為唔知買咩色。同埋早啲個，可以早啲同兩個哥哥做心理準備。」佢話大仔已經7歲，細仔就3歲，所以舊嘅嬰兒用品已經轉贈咗畀人：「都係祝福同埋環保，平日自己都帶袋去街市買餸。」

講到政府公佈財政預算案，將派發10000張海洋公園門票畀學生，被指派得太少？陳倩揚話如果可以多啲人受惠就更好：「其實多啲博物館、生態公園嗰啲，可以有多啲免費就更好。」

精選娛聞，喺晒《娛果》
http://fb.com/appledailyent