盛傳獲阿爺欽點代表建制派參加今年11月九龍西補選的前食衛局政治助理陳凱欣，雖然至今自稱未決定係咪參選，但近月除咗以「健康大使」自居，將自己副尊容同個大名喺多個主要交通工具大賣廣告宣傳，更開設個人Facebook專頁，不時上載民生議題短片，似乎想趁正式宣佈參選前，先做盡唔使計選舉經費嘅宣傳，參選意味甚濃。

雖然睇陳凱欣短片嘅人唔算多，例如一段前日上載，講開學問題嘅短片，至今日中午都只有不足一千人睇過，但就獲得民建聯同唔少建制派地區組織分享，當中更包括中國共產黨黨報人民日報旗下嘅「人民網」，以及新華社亞太總分社開設嘅「新華香港」！陳凱欣背後有乜勢力撐腰？都好清楚嘞啩！

講返呢段陳凱欣嘅短片，內容都幾有趣㗎，佢話「謾罵式教導只會令子女出現條件反射不喜歡學習」，又話「家長們放鬆一點，可能會有更好的效果」。唔知最近頻頻高調喪鬧學生嘅一班建制派同高官，係咪有所得著呢？