教波能力被質疑，近期俾傳媒插到暈嘅阿根廷國家隊教頭馬勒當拿，我求大俠懷疑佢做咗《癲佬正傳》入面嘅主角秦沛，係咁喺度嗌：「有殺冇賠……有殺冇賠……」話說阿根廷下周三友賽加納，老馬竟然重召咗缺席國際賽6年嘅奧迪加入隊，希望幫佢重振聲威。霉到要搵35歲嘅老將幫手，仲唔係癲到有殺冇賠？
老馬首次被插，都要追溯番今年4月嘅世盃外，作客慘負玻利維亞1:6，嗰時俾人話佢冇為高原氣候作充份準備，搞到球員莫氣輸鑊勁。直到本月5號，再主場1:3輸畀宿敵巴西，咩面都冇晒；接住作客0:1再輸巴拉圭，令球隊陷出局邊緣。

下周三友賽加納重土炮

球隊成績欠佳加上傳媒嘅壓力，令老馬個人越嚟越癲，下周三友賽加納，佢竟然重召老將奧迪加救亡。雖則呢場係友賽唔係世盃外啫，但老馬明知自己帥位岌岌可危，都唔使搵晒一大班新仔入隊呀嘛？唔通真係博炒之前，益吓班新人過吓癮？
睇番個陣，19人大軍大部份來自阿根廷國內聯賽嘅球員，赴歐搵食嘅巨星一個都冇，難道老馬孤注一擲，搵國內兵博埋呢鋪先算？唉，連小保加嘅射手巴勒莫都入選，但呢位老將射手周中喺球會操練對賽時，又射失咗3球12碼；我求大俠記得巴勒莫喺99年美洲國家盃嗰陣，對哥倫比亞都射失過3球12碼，最後累阿根廷輸0:3。老馬今次都照選巴勒莫，睇怕佢真係已經癲咗喇。計我求大俠話，老馬不如去盡啲，重召埋當年自己喺球場上嘅好拍檔「風之子」肯尼基亞同埋「巴迪高」巴迪斯圖達吖？