聖誕節斥資兩千萬谷商場人流量嘅信和置業，又再動用八百萬，為旗下十個商場進行春節裝飾布置、送贈禮品等推廣活動。
信和置業旗下信和物業管理總經理陳欽玲預期，農曆年期間旗下商場人流量將有十到十五個巴仙增幅。據佢講，聖誕假期間，集團商場人流量全面向好，其中大角嘴奧海城升幅達兩成半，𠵱家假日人流量十九萬至二十萬人次，至於啱啱翻新嘅尖沙嘴中港城，人流量由舊時每日六萬至七萬，增加至十萬。
信和旗下商場包括屯門市廣場、尖沙嘴中港城、奧海城一期及二期、小西灣藍灣廣場、粉嶺帝庭軒商場等。
至於市場憂慮「沙士」重臨，陳欽玲就話，信和已做好預防工作，商場會加密消毒清潔等工作。

富城管理提供禮賓司服務
𠵱家做物業管理都要不斷增值，好似富城集團最近攞到半山嘉慧園同上環帝后華庭嘅管理合約，重率先全面提供「禮賓司服務」。
聽富城講，會有一組同事負責呢項服務，包括餐廳定位、機票定位、秘書服務、旅遊資訊同郵遞服務等，一系列五星級酒店至有嘅服務。佢強調，管理費就冇加到。
嘉慧園係豪宅兼特首府，提供呢啲服務唔出奇，一般屋苑都有就少見啲，據聞富城喺部份屋苑都有類似嘅服務，但唔夠全面。聽講下一個會全面提供「禮賓司服務」嘅屋苑係何文田君頤峰。