新一季英超聯周六就揭幕，好多球迷會關心利物浦同阿仙奴會唔會旗開得勝；不過講賭盤，平手盤梗係賭布力般流浪啦。
「平手盤，買主隊」，呢啲呃賭波初哥嘅所謂入門秘訣，真係害死人；佔主場之利都唔使讓對手，咁隊波係莊家心目中一定好極有限。樸茅簽入蘇甘保、占士呢啲過氣國腳，係就係多人識，不過肯定走下坡；或者球迷擔心布力般走咗首席射手比拿美，會唔會影響攻力，不過簽入嘅羅拔斯同麥卡菲，都叫有番咁上下份量，中場繼續由摩頓柏達臣擔正，唔使怕樸茅。

切忌再捧聖日耳門

法甲打咗兩周，最令人洩氣當然係巴黎聖日耳門，呢隊首都球會人腳唔差，不過頭兩場都開唔到齋，再唔係冇運，而係班波有問題；今次聖日耳門對住2戰2勝嘅里爾，因為往績關係，仲要讓平/半，唔使諗咁多，捧下盤。另外周日登場嘅班霸里昂，上仗主場贏唔到，多少令擁躉失望；不過睇番上場，馬隆達、祖連奴比南布肯奴、哥柏呢啲世界盃國腳已上番陣，打完一場狀態應該提升唔少，作客對住波爾多，平手盤要博多次里昂。
周六荷甲聯都開咧，阿爾克馬爾實力明顯唔及得以前，首仗對住NAC，大膽博一博NAC不敗，捧讓球主客和「客勝」。
文︰牽牛