中美貿易談判達成第一階段協議，執筆時仍未有細節，但同坊間預期一樣，第一階段協議只係錢能解決之事。至於結構性改革，原則上承諾改革，實際上點做任佢兜。美國要求中國之結構性改革，強迫技術轉移部分有得傾，取消補貼、國企改革唔會有得傾，牽涉兩大問題。

其一即過去提及，中國之國家資本主義，其實係現代的封企食祿，一方國企就係一方諸侯。掌控經濟也就是掌控人民，國企掌控經濟，黨掌控國企。外力要求打開中國市場，會衝擊當下中共這種統治模式。為應對衝擊，國進民退，信用系統，極盡監控之能事，只為防對社會之掌控力度下降。改革涉及劃位，萊特希澤用強硬派與改革派之委婉講法帶過。所以下一階段傾國企改革，只會緣木求魚。

其二，中國如果全面開放，等於畀美國揭你數簿。內地所有賬目，從來都係檯面檯底兩條數。當中究竟有幾多爛賬，隨時連共產黨自己都講唔清。在中國經濟相對封閉時，所有嘢到最後由中央出面檯底拆掂佢，或債轉股，或爛賬轉移去另一間公司，夾硬嚟就可以。

如果全面開放，賬目上的爭拗要經法律檯面上公開處理，最嚴重情況係可以引爆金融危機。好似08年金融海嘯，CDS個窿究竟有幾大？初期一個講法係20萬億（美元，下同），另一講法係60萬億。金融講個信字，失信條數點計，好多時講唔清，講唔清就會有恐慌。

萊特希澤指，中國同意未來兩年增購2,000億美國商品和服務，當中包括320億農產品。2017年中國買美國農產品240億，未來兩年多買320億，一年160億。所以每年買400億美國農產品，其實只係中方最初提出4、500億之下限。萊特希澤指的2000億屬增購，即係話中國以每年1000億買兩年緩衝期，再諗計，兩年後點到時再算。

近年中國對全球貿易順差，每年約3,000至4,000億。往後兩年每年要畀多美國1,000億，其實也就係特朗普初期要求減低美中貿易逆差條數，兩年後隨時再加碼。此1,000億大部分會從他國貿易上加減彌補，唔夠先從其他地方籌旗。

匹夫無罪，懷璧其罪。唐伯虎入寧王朱宸濠府後發現條友唔對路，但入得呢個堂口唔係你話走就走，最後靠扮癲方能脫身。賢能有識者謙退，小人有識者亦卸，那餘下大機會由小人無識者上。香港往後幾年也難捱。

Mr.Tregunter

---------------------
2020年 股樓何去何從
林本利教你部署退休生活
點擊參加【林本利2020股樓部署】FAN享會
-----------------------
屬於香港人的移民攻略
立即登入【全球樓行】
Dream House零距離