【新增訪問及圖片】

外籍騎師贏開有條路，這天（29日）谷草日馬由第二場開始一直由佢哋建功，其中第四場四班1200米輪到意大利籍騎師李寶利發威，佢騎姚本輝馬房「指揮官」後上擊敗潘頓座騎「萬利高」勝出，單Win及組合獨贏A2分別派81.5及32元。

「指揮官」上仗由華將梁家俊於此程排第2檔跑第二，輸俾頭馬「友享友賞」一個馬位，呢鋪由班次、途程及檔位維持不變，騎師則因梁家俊答應騎「旅英駿爵」在先，分唔到身，因此「指揮官」換上李寶利。

結果沿途守第五位之次熱門「指揮官」半條直路從外叠後發先至，影相氣走楔咗內欄一度透出的大熱門「萬利高」險勝一頭位成功補中，從而效法第二場「白鷺飛翔」及第三場「勝利公爵」敲響服役勝鼓。

姚本輝表示「指揮官」馬仔細細粒合快活谷發揮，李寶利吸收了日前拼敗廐侶「航天勇將」的經驗受了教訓，今次跑「指揮官」醒目得多，將功補過。姚本輝又謂「指揮官」非常幸運，對手「萬利高」塞塞哋，令「指揮官」順利取勝。

熱開繼續熱，今場由次熱「指揮官」2檔起步勝出，大熱「萬利高」則排1檔跑第二，最內檔馬5.5倍大熱Ｑ順利開出，三、四名分別為「金剛秀」與「及時行樂」，四重彩派一萬蚊鬆啲。