50歲台灣音樂人、人稱小胖老師嘅袁惟仁自10月17日喺上海跌倒後腦出血昏迷不醒，需要緊急做手術（ 新聞連結： http://bit.ly/2R16zBC），但手術後情況未見樂觀，已經臥床超過兩個月。

不過今日有好消息喇！據台灣《蘋果日報》報道，小胖老師已經蘇醒，噚晚更由上海飛返台灣，而小胖老師嘅經理人公司隨即亦證實此事，更透露小胖老師依家已經可以睜開眼認人，更可以有握手及簡單回應，不過因為做過氣管切開手術，所以目前仲未講得嘢。據知，小胖老師身上嘅喉管包括鼻胃喉都已經拎走咗，一切都向好嘅方向發展，不過因為臥床超過兩個月，小胖老師至少瘦咗40磅。

而噚晚同小胖老師同機返台嘅除咗袁媽媽同佢嘅胞姐之外，仲有當初發現小胖老師暈倒嘅救命女友菲林，小胖老師落機後即被救護車送去台北榮民總醫院嘅加護病房繼續治療，雖然小胖老師已經清醒，但台灣醫院方面希望以最謹慎嘅態度重新評估病情，而小胖老師嘅腦瘤亦會由台灣方面再次檢查。

袁惟仁今次臥床兩個月，醫藥費達40萬人民幣（約45萬港元），呢筆費用會由當地製作單位承擔，而返台後嘅醫療費用則由袁惟仁嘅經理人公司負責。

袁惟仁嘅囝囝袁義及囡囡袁融曾多次往返上海台灣兩地探病，終於等到爸爸返到屋企，袁義噚晚已經去過探望爸爸，佢話：「很感謝所有幫忙爸爸的人，如今已經熬過一半了。」而同樣多次到上海探病嘅前妻陸元琪亦表示：「我覺得，人，可以平安回家真好。平安就好，其他沒我的事了。他們開心，爸爸進步了，這樣就好。」

精選娛聞，喺晒《娛果》
http://fb.com/appledailyent