噚日9月1日除咗係莘莘學子嘅開學日，原來仲係富豪酒店（078）太子女羅寶文（Poman）嘅生日，佢噚日就同華華講，今年嘅生日願望係身邊嘅人身體健康、開開心心，唔會特別搞派對慶祝，每年都只係同屋企人一齊靜靜哋食餐飯。篤信佛教嘅Poman係素食者，所以佢話會趁自己生日「逼」其他家人齊齊喺自己酒店食餐齋菜喎。
講到心水生日禮物，Poman就話，自己一向大頭蝦，成日會整唔見啲小飾物，所以都好怕收到名貴嘅嘢，加上身邊嘅人都知道自己唔注重物質，所以已經唔會買禮物。

屬處女座　追求完美

Poman作為處女座一分子，都同意自己有時候好執着、追求完美，尤其關係到公司品牌、策略嘅時候，就特別堅持自己，「但未至於對生命入面，每一樣嘢都追求完美，我覺得有啲嘢需要執着，我會去執着」。
愛心爆棚嘅Poman又話，佢今年開始參與「美麗中國」，去教育資源匱乏地區義教，佢亦計劃喺9月、10月去雲南、貴州，親力親為為教育做善事。
「好多嘢都耕耘咗一段時間，希望有成果」，Poman以愛犬命名嘅教育品牌「寶狄與好友」，旗下嘅卡通動漫不經不覺已經喺內地播咗兩季，Poman話「黃金時段喺央視、湖南衞視都收視第一」，嚟緊聖誕、農曆新年就會播第三季喎。

李華華
mailto:[email protected]