資深演員陳哲民早年贏得首部劇情電影計劃冠軍，獲資助拍攝的電影《散後》（前名《戀@廣場》），找來一班新演員演出，故事藉雨傘運動探討身份認同，講年輕人的愛情故事，學運是令電影更貼近現實，學運後這班後生仔何去何從？電影完成至今兩年多，由影意志負責發行，先後在藝術中心放映多場，反應都不俗，但暫時未有安排在傳統戲院上映。

《散後》導演陳哲民早前跟陳烈文、馮海銳（Yoyo）兩位演員接受《蘋果》訪問，對於自我審查越趨嚴謹，加上《國安法》動輒得咎，對於 香港 電影未來，導演都擔心往後日子，類似《散後》題材的電影，未必有機會再拍，他說︰「可能冇機會再拍，不過人在做，天在看，有啲事可以做就盡力做，到發生時就去面對。如果任何事你覺得應該做，唔應該因為出於恐懼而唔做，創作就是要天馬行空。」陳哲民帶點無奈為作品「平反」，電影只是借傘運帶出一班年輕人的故事，在大時代下各人何去何從，未涉及任何政治元素。國法通過後導演再接受訪問，對於電影能否公映自言是見步行步︰「之前都已係。但部戲冇講『港獨』，亦已過咗政府程序，見步行步。」

陳哲民話導演的心態，自然希望作品可以在大銀幕放映，他略帶自豪的說︰「拍嘅時候都係以大銀幕放映為依歸，至於最終結果如何，有擔心過因為題材，有可能排唔到戲院。不過未發生前，一切正常繼續運作。我嘅心態係乜嘢都擔心，就乜都唔使做。」他笑謂根據首部劇情計劃條款，獲資助拍攝的電影要在戲院上夠場數，才可收到尾期。

馮海銳（Yoyo）就話作為演員最擔心、最不想見到的是創作自由被扼殺，她舉例話︰「如果鬧警察係『黑警』需要道歉嘅話，咁唔好拍警匪片囉。因為警匪片一向都係香港商業電影主要題材。咁拍《PTU》要唔要道歉？講差佬打人喎、警警相衛喎？咁杜琪峯導演係咪要道歉？我唔知道警察係咪覺得真實一面被人公開，所以就唔拍得呢啲題材，係咁樣香港電影唔使拍嘞。」

陳烈文接戲時是大學畢業素人一名，原已獲聘做教師，因為接拍《散後》放棄教職，他說︰「其實我打算做中學老師，嗰次係陪劇社朋友去試鏡。當時覺得仲年輕可以試就去試，至於教書將來應該仲可以。」一次就愛上演出，之後報讀演藝學院表演系，今年將會畢業。他自言將來的事很難料，至少接拍《散後》時以至這一刻都未有包袱，他笑說︰「我又唔係大明星、分分鐘幾十萬上落。又唔會有團隊（勸）『文哥你唔好拍呢部戲啦』。」