【新增內容】

香港不敗拳王──「神奇小子」曹星如（Rex）又再出戰，佢今晚喺灣仔會展挑戰左撇日本拳王向井寬史，曾經同佢合拍過廣告嘅曾江、梁家仁，以及任達華、蔚雨芯、狄易達、蔡一智同葉佩雯夫婦等都有現身，而早前因熱捧英國男神班尼狄甘巴貝治（Benedict Cumberbatch）而衝出國際嘅鄭裕玲（Do姐）都有嚟打氣。

曾江早前同Rex拍過廣告，兩人惺惺相惜，曾江今晚特別嚟撐對方，佢話：「我冇睇過現場，之前喺電視同上網有睇過片段，拳賽主要睇拳手，有料先好睇，好似Rex咁，體育嘅嘢最緊要支持，大家盡力打好拳賽最重要。」曾江欣賞Rex係君子，好有體育精神，賽前會呼籲唔可以噓對手。

熱愛攝影嘅任達華，第一次睇拳賽都不忘帶齊攝影架生，佢話：「好想幫佢影吓相，佢好代表香港精神，希望影完將佢收錄書中一節，但啲相會問咗佢先。大家要多支持運動，好似足球同乒乓球都需要支持。」蔡一智都係首次現場睇拳賽：「睇過片段對佢印象好深刻，慢鏡對方出一拳，Rex出兩拳，今晚香港必勝。」不過Do姐、葉佩雯同老公Eric Kwok因為趕入場，所以冇做訪問。

余文樂都有嚟到，佢仲話佢自己係第一次嚟到現場睇拳賽，佢話：「我特登嚟支持，對佢有信心，希望佢贏。」趙世曾同女伴、徐濠縈、李克勤盧淑儀兩公婆、狄龍夫婦、林海峰、吳雨霏夫婦、陳志雲、林奕匡及未婚妻李靄璣（Rikko）都有去睇拳賽。

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。