【不斷更新】Joey斜台載歌載舞 超時罰錢悼念盧凱彤
蘋果日報 2019/08/05 20:20
容祖兒光復香港
合共18場的容祖兒「PRETTY CRAZY JOEY YUNG CONCERT TOUR」演唱會今晚在於紅館開鑼，下午一度傳出因為「三罷」關係，今晚頭場取消演出，改為下周一補演，不過，大會最後於下午5時宣佈演唱會如期舉行，並在6時發聲明指可為未能到場的觀眾安排退票。
Joey的媽媽、老闆楊受成、同門的Twins、張敬軒、鍾舒漫、曾樂彤等睇騷，而Joey的好友黃偉文（Wyman）、草蜢、陳慧嫻、谷德昭及「抗癌歌手」李明蔚等都有去捧場。不過今晚演唱會未能準時開騷，比原定8點15分的開騷時間遲了超過45分鐘仍未開始，而Joey fans就全力支持，差不多坐滿九成座位。在等候期間，有人大叫「光復香港 香港加油」，有人拍手和應，現場亦有人高舉黃色標語「反送中」。最終在全場等了接近一小時後有人高叫回水，但同時Joey亦出場揭幕。
Joey的演唱會穿着白色LED衫、站在球體道具中唱《空港》登場，之後先後唱出《再見我的初戀》及《天之驕女》等歌曲，之後Joey表示自己很期待這個演唱會的來臨，又指自己今次與自己的team很有誠意地花時間去製作，更邀得世界各地的精英合力製作這個演唱會。
而Joey在唱《搜神記》時，向觀眾表示：「等個台整好咗，我先跳舞畀大家睇。」後來記者發現台面的確有不平坦的地方，不過Joey及舞蹈員仍站在上面跳舞。而記者另發現有工作人員偷偷從台底伸頭出來，疑把握時間修理舞台。
另外，有人掟類似「水樽」物體上台，但當時Joey在台上另一邊唱歌中，所以未被掟中，其後有個男表演者見狀踢開。而Joey在台上一度激動落淚，fans即歡呼為她加油。
Joey後來行去飛船上唱歌，其間有歌迷要求握手，她笑說：「握手位呀，冇所謂，今日黃大仙，有求必應。」不過她在飛船唱《世上只有》時，唱到最尾突然沒有聲音。之後Joey繼續喺飛船上，分別與不同的現場觀眾合唱《這分鐘更愛你》和《我的驕傲》。
張學友擔任今晚的表演嘉賓，與Joey合唱《這麼遠那麼近》，之後Joey開玩笑說：「咁樣係咪值回$980呢？」學友在台上感謝Joey，Joey就說自己由中學開始聽學友唱歌，她又賣口乖說：「學友哥哥係冇年齡限制嘅！」由於Joey遲了開騷，故此今晚超時演出，由晚上11點30分後開始計數罰錢，但Joey唱到最後兩首歌，忽然表示：「呢首歌，我想送畀遠方嘅朋友，因為佢上年嘅今日離開咗我哋，希望大家都喜歡呢首歌。」悼念去年墮樓身亡的盧凱彤，然後Joey唱《華麗邂逅》。
Joey台上向大家抱歉，表示今晚所有觀眾，持今晚門票，喺8月12日再去紅館，佢雖然當日休息，但決定做多一場畀大家睇，仲約定大家，不見不散，再唱最後一首歌《心淡》。
採訪、攝影：黃曉妍、陳俊強