唔少藝人有投資，買磚頭開舖嗰啲都係常見事，仲有一啲愛投資股票，好似國際巨星范冰冰（范爺）咁，係大陸影視製作公司「唐德影視」嘅「星級」股東。

據今日台灣《鏡週刊》報道指，喺今個月19日，唐德影視股價一度下滑，收巿時跌至21.56元（人民幣，下同），比年初開盤時嘅28.47元下跌6.91元，跌幅逾24%，以范爺嘅為644.96萬股持股量嚟計，佢份身家唔見咗4,456.6萬元（約5,249萬港元）。

好在唐德影視呢幾日「爭氣」，股價回升，至今午1時10分，股價一度回升至22.32元，比年初開盤時嘅股價28.47元下跌6.15元，不過范爺份身家依然唔見咗3,966萬人民幣（約4,671.7萬港元），只係比一星期前好少少咁解…

其實唐德影視係喺10幾年前成立嘅公司，旗下拍過逾30套劇集，最為港人知嘅應該係范爺主演嘅《武媚娘傳奇》。其實唐德影視前年上巿時，范爺同《還珠格格》中嘅好姊妹趙薇都有現身唐德影視嘅股東大會（新聞連結： http://bit.ly/2uzKWhz ），兩人都係投資者，據知仲有趙薇哥哥趙健。而范爺當初嘅投資成本為296.7萬元（當時持股量為128.99萬股），今日嚟計佢喺唐德影視份錢都已有1.43億元，係當初投資嘅48倍，所以「唔見」咗4,000萬人仔，其實都唔叫好入肉啫……