蘋果批:的士慢駛同跌市有關? - 高明輝
政府公佈的士新收費,原意係「確保市場秩序」,但未出台就引發的士司機慢駛抗議。其實,的士嘅「基本市場秩序」係載客,政府嘅措施達唔到呢個目的,就係失職。究竟新措施可唔可以維持的士「載客」呢個「基本市場秩序」呢?
撰文:高明輝
司機最主要成本來自車租,空車就係浪費。沙士時期,市道極差,受經濟波動影響極大嘅的士業首當其衝。夾硬維持劃一價,司機就難有生意,所以司機開始以八折自救。
其實唔同時段或地點,需求都唔同,要令的士最有效率咁使用,就係增加載客時間,從而令收入增加。只要能增加的士載客時間,的士司機有時會選擇打折。
政府今次「新措施」嘅目的,係為咗打擊八折的。但無論政府點調整價格,加價又好、「長減短加」又好,只要都係劃一跟咪錶價,市道一差,一樣會出現不同形式嘅折扣黨,例如「泥鯭的」或過海單程等。
何況司機搵客本身都有成本,乘客一個電話解決司機搵客嘅費時失事,令減價變得合理。政府真正打擊嘅,其實係乘客嘅方便,同的士司機嘅收入。結果只會趕走乘客,令到乘客轉乘其他交通工具。
而且「經濟增長」往往係打擊八折的最有效方法。市道好嘅時候,周街都係乘客,司機會主動拆除「折扣電話」。
好多司機都用股市嚟做「的士市道指標」。政府劃一調價,莫講話係要長遠使用,就連諮詢期到真正落實,市道已經唔同晒,出現「時差」,一旦跌市,乘客嘅需求又唔同先前傾出嚟嘅結果,結果劃一調價永遠冇辦法捕捉到實際需求,點諮詢司機都會不滿。
本來民間已經憑創意同科技,以折扣形式去完善劃一價嘅不足,提升彈性,增加司機收入,連帶車租亦有上調空間。但係政府夾硬要「維持市場秩序」,結果反而令到司機慢駛抗議,連的士用嚟載客嘅「基本市場秩序」都維持唔到,令政府喺危機之中更見弱勢,真係自作自受。