將於下周三踏入37歲嘅韓版《花樣男子》女星韓彩英，2007年與大四歲嘅企業家崔東俊結婚，並於2013年8月誕下囝囝。近日佢演出綜藝節目《Happy Together 3》時就提到老公，呻結婚10年老公變咗，講嘢越發直接。

韓彩英當年僅26歲就嫁作人妻，「國民MC」劉在錫就問韓彩英覺唔覺得自己太早結婚，韓彩英表示：「結婚時我冇咩怨言同不滿，但20幾歲結婚，令我冇時間同朋友玩，對此比較可惜。」韓彩英續指：「反正遲早都係要結婚，咁遲啲結都冇所謂。」似乎佢依家有啲後悔當年咁早嫁。

被問到婚後生活，韓彩英則指：「老公本來唔會講我唔想聽嘅嘢，但最近越嚟越直接。結婚初期無論我講咩，佢都會講『你好靚』、『幾好啊』，但我之前拍《姐姐們的Slam Dunk2》體驗女團生活要跳舞時，老公就直接踩我『你係音痴，跳舞又生硬，節奏都跟唔上』，令我受到好大打擊。」