泰維斯喺今年年初由小保加加盟中超上海申花，坐擁據報係全球足球員最高人工，一年收3.2億港元。可惜泰仔強勢加盟，點知嚟到冇料到，半年過後喺中超只入得3球。早排仲稱傷返去阿根廷，到今個月先歸隊。泰仔性價比咁低，真係辜負咗申花畀咁多錢佢，點知佢日前接受訪問，竟然向中超踩多腳，抨擊中國足球水平低，指過多50年都唔會追得上世界級水平。

泰維斯接受法國傳媒《ouest france》話：「中國球員喺技術上唔係太多，最近推廣嘅新政會畀小朋友更多機會踢波，會對提高中國足球水準有幫助。不過我唔認為中超聯賽有能力同任何歐洲頂級聯賽相比，就算有出色球員加入都唔掂，我認為喺至少未來50年之內，（要追趕得上歐洲聯賽）都係唔太可能。」