當年今日
關於我們

【師兄你點睇】尾場我信何澤堯的選擇(賴維銘)

蘋果日報 2019/06/02 08:00

二郎師兄你點睇力奇先鋒賴維銘

賴:賴維銘
記:記者吳文輝
記:近期賽事真係有點悶,因為被潘頓及莫雷拉壟斷大局,兩人兩次賽事夾埋贏咗16場,而且多數唔好分,好似你騎過嘅「天地人」都賣到得番13蚊,不過最終都贏到,刻意飛起大熱門真係無着數。
賴:熱門馬交出應有水準,勝出都好合情合理,起碼好過有啲馬水準飄忽啦!至於你講開嘅「天地人」,我自己真係好鍾意,而良哥(何良)亦好關照肯畀我騎,只係之後停賽無緣再效力,匹馬最近連贏兩場都戥馬主及良哥高興,相信下季會繼續有好成績。
記:潘頓同莫雷拉成績太過突出,不過你師弟何澤堯都唔失禮,今季已經贏咗48場,好快突破50大關,呢個成績對華將嚟講真唔簡單。
賴:係呀,華將要索取實力座騎唔易,不過何澤堯今季表現好,畀到馬主及練馬師信心,自然多好馬騎。
好似今期(2日)最尾第11場二班草地1200米,他本來可騎由自己贏過的「百勝龍」,結果都係揀「力奇先鋒」,絕對有輕重之分。
「力奇先鋒」之前表現平平,自從何澤堯接手後兩場都發揮出色全勝,當然馬本身有進步,今場4檔好,而且牠不受場地限制,應該穩位望贏。
記:今次有唔少泥地好form嘅馬轉跑草地,你覺得呢類馬可唔可以保持佢哋嘅水準?
賴:呢樣好難一概而論,我騎過一些泥地好勁嘅馬,但跑草就冇咗嗰種勁度,但有一類馬就兩個場地都差不多,狀態好時跑乜都得,亦即泥、草皆宜!
今次我認為第三場四班1400米之「二郎」轉回草地一樣會跑得好,事關根本之前跑草都有好走勢,馬本身進步緊,跑草冇理由唔得。
---------------------------
【六四30】守住歷史 拒絕遺忘
https://hk.adai.ly/zdzKtt2RiW