掀深圳玩ROCK熱潮
貼身追擊BEYOND葉世榮
香港歌星北上深圳登台已經司空見慣，但北上夾Band玩搖滾樂則少見。Beyond成員之一嘅葉世榮，剛於上周喺深圳BingoDisco搞咗個迷你演唱會，雖然地方唔夠香港紅館咁闊落，但喺雷射燈光及強勁大型音響下，現場嘅氣氛極之熱情澎湃，人人情緒高漲。現時深圳酒吧正掀起夾Band演唱潮流，小記就搵葉世榮講解呢股深圳玩Rock新熱潮。
記者：梁煒健
攝影：林栢鈞
唱Beyond名曲推向高潮
是夜演唱時間雖然只得1小時，期間世榮除咗演唱個人首本名曲如《藍天》、《騙局》、《美麗的時光機械》等，令Fans十分陶醉，末段世榮更全新演繹BEYOND嘅經典舊作，如《不再猶豫》、《海闊天空》、《喜歡你》，令現場嘅情緒推至最高峯，接近失控，尤其一首《真的愛你》名曲更令Fans狂歌起舞，小記在現場亦可感染到呢股熱情。
世榮鍾情內地表演
Beyond成員葉世榮先後去過北京、西安及深圳等地作音樂交流，對於在內地表演，坦言感覺遠勝香港：「喺深圳表演無咁侷促。雖然我做過唔少音樂交流，不過，今次才算首次正式在深圳Disco搞Show，配合大型音響及雷射燈光下，表演更有Feel！此外，現在深圳亦盛行在酒店內玩LiveBand，簡直就似置身喺一間有酒飲嘅Band房，更真情流露，演出更自然。」
半夜開Show氣氛勁High
BingoDisco容納逾千人，Disco內無論喺舞池、走廊及上下兩層每一角落均人頭湧湧。雖然葉世榮演唱時間為凌晨1時，但眾Fans早已到場飲酒跳舞。世榮一出場，現場強勁音響及雷射燈光下，更加熱情澎湃，氣氛十足像火上加油一樣，非常熾熱。
內地樂隊甚具潛質
深圳酒吧文化興盛，好多酒吧都會有駐場樂隊或特聘著名歌星客串表演，而葉世榮亦先後到不少酒吧捧場，對內地樂隊有甚高評價：「由於兩地語言不同，內地音樂具有濃烈中國格式及文化背景，感覺相當不錯。好似『無心快語』酒吧一隊駐場樂隊女子組合『黑蜘蛛』，演出相當不俗，多點磨練必成大器。」
BingoDisco
地址：深圳市紅嶺路金華街1號
電話：86-755-2272999
座位：250個（全場可容納1,000人）
交通：從羅湖關口乘的士前往，車程約10分鐘，車費約?25。
夾Band表演繼續爆發
葉世榮打算在深圳多間酒吧推廣本地搖滾樂，除香港PopMusic外，更玩電子化DanceBeat搖滾樂，甚至喺世榮嘅新作同Beyond經典名曲。一月中旬開始，他將於深圳「左右吧」及「都巿牛仔淘金吧」客串演唱。現時還未落實時間，Fans上去深圳前，不妨打電話查詢詳情，不過，可肯定係夾Band熱潮會延續落去。
左右吧
地址：深圳華富路1032號地下
電話：86-755-3217257
營業時間：晚上7:30至凌晨2:00
都巿牛仔淘金吧
地址：羅湖華麗路集浩花園2樓
電話：86-755-5547976
營業時間：晚上8:00至凌晨2:00