【李八方online】扶貧委員會劉鳴煒留低 鄧家彪接棒
李八方ONLINE劉鳴煒扶貧委員會鄧家彪
扶貧委員會今日舉行任期內最後一次大會,扶委員主席兼政務司司長張建宗今晚就喺會展設宴,慰勞一班委員,答謝佢哋多年來積極參與扶貧工作。上屆政府於2012年11月重設扶委會,經歷兩屆,第二屆會期將於本月底完結,料政府下周五(29日)會公佈新任委員名單。
現時扶委會非官方委員有18人,大部份委員已冧莊兩屆,冇得留低,未夠鐘起身只剩3人,包括package好掂兼有「男神」稱號嘅華人置業主席劉鳴煒、科大榮休教授雷鼎鳴,同埋立法會主席梁君彥嘅公子梁宏正。八方聽聞,政府已經向3人招手,等緊佢哋回覆。
扶委會成員由唔同界別組成,包括非政府組織、政黨、勞工團體同商界等,今次換屆,唔少組織都交棒,好似社區組織協會主任何喜華將退任,八方亦聽聞,政府已邀請社協幹事施麗珊加入扶委會,工聯會鄧家彪則接任榮譽會長林淑儀;至於民建聯,就有機會由立法會福利事務委員會委員柯創盛出任。
扶委會現設4個專責小組,當中唔少增補委員,好似來自商界嘅恆基地產副主席李家傑、安老事務委員會主席林正財等,估計換屆後都有機「升呢」坐正。