影后劉嘉玲近年踩入唔同行業，喺商界大展拳腳，其中佢喺上個月18號喺上海自家工作室正式宣布用佢個英文名CarinaLau成立品牌，首波推出紅酒同香檳，更於阿里巴巴旗下嘅天貓商城開賣，至今個幾月，已經賣出超過25萬支。阿里巴巴總裁馬雲今日更請咗嘉玲姐去到杭州西溪園區企業總部見面，嘉玲姐仲帶埋喺法國合作嘅酒莊夥伴到訪，非常大陣仗。

雖然馬雲同嘉玲姐唔係初相識，但話晒今次係以生意夥伴嘅身份會面，所以佢哋都有準備見面禮，馬雲送咗一對有寓意嘅公仔畀佢，而嘉玲姐就梗係送上啱啱由法國香檳區空運嚟嘅頂級金瓶CarinaLau香檳畀馬雲。

馬雲話，希望明年農曆年前，嘉玲姐啲酒嘅銷量可以突破1,000萬支，刷新紀錄。