牛市時都會有好多獨有現象，包括全民皆股、少年股神湧現等，不過今次呢一浪，就衍生多一個現象，就係新聞主播轉行加盟券商。女主播樣靚靚，形象專業，加盟變相為券商做宣傳。不過眼見最近加盟券商嘅主播BB，密密上娛樂版，係咁接Freelance，出席一啲唔關財經事嘅活動，話題係有，但似藝人多過財金界人士，仲要係負面新聞主導，睇嚟嗰間券商要努力多兩分，去幫主播BB洗底先得。

另外今日推介彩虹電子（438）。洗衫板為央企中國電子信息集團旗下，聽到央企大家即時自然聯想到「重組」呢兩隻字。首先，內地國企正積極籌備混合所有改革制，中國電子信息旗下有12隻A股上市公司，5隻H股上市公司，仲要唔係間間做得好。於央企改革大勢下，中國電子信息自然要做嘢，去清理門戶。

中國電子去年底，就將長城科技（074）私有化，呢個係第一步。至於點解咁多隻要揀彩虹電子，事關母公司已開始處理呢塊洗衫板。彩虹電子原本負債勁，不過今年2月公佈資產重組交易，將所持A股彩虹公司13.5%賣畀咸陽彩虹，代價為約9億元。彩虹公司係一隻ST股，連蝕多年之餘仲要高負債，今次出售後，彩虹公司唔再Under彩虹電子，冇咗負累，彩虹電子即時輕身上路。母公司有信心將彩虹電子執返靚仔，我唔信冇後續囉。

彩虹電子H股市值約5.6億元，連同內資股市值約20億元，對比同系公司，市值可說最偏低。同系中國電子（085）近期表現強勢，噚日同系熊貓電子A股漲停、H股升6%。同系升咁多，冇理由彩虹電子冇份，隻股股價近期蠢蠢欲動，買定博佢好消息。