被任命為「樹王」嘅政務司司長唐公子，秉承做好呢份工信念，噚日同18區區議會正副主席會面討論樹木管理工作，佢話樹木有生老病死，所以必須要有一個高層次、權威性機構去訂立一套方式，令政府知道如何維護樹木。

增強培訓樹木隊員

政府管理樹木政出多門互相卸責，搞到好多大樹吊吊fing險象環生，區議員認為要加強協調，全面檢討，仲要好好培訓員工，特別係樹木隊員工，唐公子話培訓要以終身學習為宗旨，所以日後會進一步檢討如何增強培訓。
唐公子今日會出席立法會內務委員會，交代做「樹王」工作進度，議員陳淑莊指早前有電影公司喺中西區拍外景，監粗移走幾棵樹，近日將幾棵樹原地重置，不過幾棵樹都謝咗好多，佢質疑電影公司冇好好照顧幾棵樹，聲言今日會把握機會追問「樹王」會否追究，否則香港啲樹俾人咁玩法，唔謝就奇。「樹王」唔易做，唐公子搞唔掂都唔使怕，一於搵西環出馬，「第二支管治隊伍」實幫到手啦。