西甲巴塞隆拿近年喺球壇認真威到盡，連攞兩屆聯賽冠軍，上季又贏埋歐冠盃冠軍，人氣飆升到極點。日前巴塞仲喺世界職業球員協會（FIFPro）嘅選舉中，旗下球員包攬晒各項年度大獎，朗拿甸奴當選足球先生、美斯獲選為全年最佳新秀，至於伊度奧就攞咗個特別貢獻獎（MeritAward），仲唔係威晒？
今次呢個獎項係由全球43,000個職業球員投票選出嚟，雖然朗拿甸奴喺今屆世盃表現唔對辦，但係近年幫球會先後兩奪聯賽冠軍同攞歐冠盃冠軍，所以仍然係球員心目中嘅最佳人選，結果「細哨」連續兩年當選FIFPro嘅足球先生。除咗「細哨」之外，美斯同伊度奧都有份攞獎，伊度奧上季入咗成26球，仲成日提倡反種族歧視，獲頒特別貢獻獎都係應得嘅。