聯儲局隔晚出招買個別公司債券，帶動美股跌轉升，之後再傳出美國總統特朗普考慮推出1萬億基建計劃，刺激道期繼續上升，帶動恒指無雛疫情第二波，半日升逾700點，證監會持牌人古天后指，「早前跳咗車都要追返」，集中精力炒個股，惟形容手機設備股「有數計無幻想」，對該板塊不太睇好。

古天后過去一直認為恒指會行「上落市」，謂現時仍然是炒股不炒市。她透露，宣佈國安法當日大跌市也有清倉避險，惟翌日見影響不太大，「個股唔跟市，我都撈返晒，跳完車要追返」。

蘋果專欄作家唐牛亦補充，指數從無偏離23,500點至24,500點區間，儘管憂慮疫情第二波會令市場出現震盪，惟市場資金太充裕，「美股低開700點轉頭掃上去，而家低開係買股票良機，今日gap up咁點搶」，重申不建議清倉強勢股，否則會錯過升浪。

兩位專家表示，指數進一步向上推至26,000點主要靠risk on情緒升溫，唐牛指出，「上26,000點要舊經濟股唔散，然後再靠騰訊（700）、港交所（388）」，視乎市場會否全面risk on。古天后續指，重磅股內銀一直落後大市，或會限制指數升幅，不如集中精力炒個股。

至於阿里巴巴（9988）能否上220元？古天后笑指自己睇長線，將目標訂於220元甚為「膚淺」，至少睇250元或280元，甚至可以AMAZON作參考。唐牛另表示，網易（9999）上市當日，騰訊及阿里一齊發力，未知是否與網易的資金釋放有關，京東（9996）將於本周四上市，可能是短炒騰訊及阿里的良機，「阿里守到$210，短炒無問題」。

另外，傳華府允美企與華為合作，多隻手機設備股落鑊炒上，古天后提醒切勿當美國完全放生華為，「美國啲嘢五時花六時變，畀你估得到，唔叫特朗普」，又稱中芯國際（981）破頂，走勢還算可以；中興（763）樓上多蟹貨，要保持戒心。唐牛不睇好丘鈦科技（1478）、舜宇光學（2382）、瑞聲（2018），稱這些股份只屬工業股，賺錢能力有限，「而家科網股有概念，有大數據已經夠炒」；古天后更笑指手機設備股「有數計無幻想」，反而「無數圍」的股份才有炒作空間。

本周推介

古天后 金山軟件（3888）目標$30-32 止蝕$26
唐牛 中國軟件國際（354） 目標$5

【午市急CALL】疫情2.0殺到 古天后、唐牛教投資攻略

日期：6月16日（周二）
時間：12:45PM – 13:15PM
主持：Willa
嘉賓：證監會持牌人古天后
嘉賓：蘋果專欄作家唐牛
WhatsApp號碼：6398-9469

重溫網址

果燃台
蘋果日報
蘋果YouTube