開講有話，唔怕生壞命，最怕改壞名。由前學民思潮骨幹黃之鋒、周庭、羅冠聰等成立嘅新政黨「香港眾志」（Demosistō）由成立至今一直「中箭」，之前已經俾人話英文名難讀，申請公司註冊（CR）至今三個星期都未有回音，又開唔到戶口籌款，但咁都未算，連佢哋想搞個網站、開個facebook專頁都俾人玩，香港眾志副主席黎汶洛同八方呻，𠵱家佢哋俾多方夾擊，唔明點解咁多人要刁難佢哋。
話說香港眾志一公佈個黨名，網上各路人馬竟搶閘成立「香港眾志」、「Demosistō」fb專頁，香港眾志都未嚟得切澄清，又有指網民已用「香港眾志」成功申請商業登記，業務係遊戲開發，有人連「Demosisto」域名都申請埋，八方真係數都數唔切，亦搞到香港眾志疲於奔命，不停對外解釋。

行政上有影響

黎汶洛同八方講，事件對佢哋行政上有些微影響，現正檢視一次，仲有乜嘢情況會俾人用「香港眾志」個名， 佢無奈反問：「點解無端端要買、要用我哋個名？」佢話要了解吓對方係咪故意刁難，現時用住demosisto.hk先，以及睇吓有乜方法攞番個網址域名。
黎又話其實組黨前後都有向前輩請教，又有問會計師同律師意見，不過公眾對學生組織同對政黨嘅期望始終唔同，加上一組黨就受三方夾擊，泛民唔信任，建制批評，本土派又覺得佢哋唔夠激。總之有乜甩漏希望可以盡快修正，從中學習喎。

李八方
mailto:[email protected]