有專人主理，特首辦facebook專頁「上亞厘畢道」又有新嘢睇，原來噚日係煲呔66歲大壽，曾太買咗66個壽包同老公慶生，有網民馬上質疑66個包點食得晒，浪費食物唔環保，點知好快就有人留言護航，指煲呔都算基層出身，一定會珍惜食物喎。

懶洗毛巾為環保

除咗食包相，仲有新短片，主角係四個參加小特首活動嘅小學生女生，佢哋提出問題，煲呔親自回應玩親民。其中一位小女生問煲呔點面對立法會議員嘅無理批評，呢條問題先假設議員批評都係「無理」，如果話冇預先篩選過，八方相信講都冇人信。
另一位女生又彈張好牌畀煲呔上，問佢點身體力行響應環保。煲呔即時化身環保先鋒，話會坐電動車，又話工作上好用電郵慳紙，屋企（即係禮賓府）則用慳電膽。呢啲招數聽落好正路，點知佢仲有獨門環保絕招，就係毛巾用多幾次至洗，話咁樣可以慳水喎。八方認為環保都要講究衞生，大家將來如果有機會同煲呔握手嘅話，最好諗清楚先。