懷特侯活（Dwight Howard）上季喺鷹隊表現麻麻，平均上陣29.7分鐘，交出13.5分同12.7籃板，而球隊今夏就將佢交易去黃蜂。不過，《ESPN》近日就爆料，指侯活喺鷹隊嘅人緣似乎唔多好，當班球員知「超人」要走時，仲喺更衣室拍晒手慶祝！

消息人士透露，鷹隊球員討厭侯活嘅主因，係呢位31歲中鋒開波前不斷講嘢，例如「所有人要落力打波，球隊要保持團體，我哋要點點點點…」但係落到場之後，侯活就表現得極差，只會喺低位要波，對手單擋後佢又唔會積極換防，令隊友覺得佢得把口。

自從侯活喺2012年離開魔術之後，無論佢去到邊隊，都會傳出佢同其他球員不和嘅消息。12/13球季效力湖人時，就傳出佢俾拜恩（Kobe Bryant）怒斥打波表現「軟過紙巾」，而佢喺2013至16球季時效力火箭時，亦傳出佢同夏登（James Harden）爭做大佬嘅消息。