商台DJ少爺占（甄子康）和當奴（唐劍康）組成的I Love You Boyz今年成軍17年，早前成功申請4月紅館檔期舉行《艾粒 Boom 紅館激戰》，目前已進入備戰狀態。

日前當奴及少爺占接受《蘋果》專訪，繼續無厘正經，當奴又強調自己才是整個騷的主角，又以「可有可無」來形容拍檔少爺占，十分絕情！當奴一臉正經表示：「演唱會主題？係我！Me！好多朋友都知艾粒啲歌我唱多啲，好聰明，所以主題就係Me！」

講到少爺占在今次演出的角色？當奴更抵死的說：「mic stand！拍檔咗咁多年，我知佢係會有唔抵得，但我都會畀個位置佢，舞台上Mic Stand都係好好嘅位置，希望佢唔好介意，不過mic stand係冇嘢做嘅，佢企喺度就得㗎喇！」

若少爺占是mic stand，豈不比當奴出場時間還多？當奴果然轉數快，隨即回應：「非常有趣問題，香港人真係好幽默，其實我到時會handheld，係唔使用mic stand嘅，或者佢做譜架囉，到時擺佢落觀眾席，等啲觀眾揸住佢，OK嘅！」

當奴又「爆料」指當晚只會唱一首歌，笑言唱完一首歌就會走，將會打破歷史紀錄，他說：「我有同學友講呀，我同佢講，其實全部歌都耳熟能詳，唔使唱到11點幾12點，唔使唱咁多首，人哋返唔到屋企㗎嘛，冇車返屋企，好聽嘅一首就夠，ONE SONG ，所以我哋唱一首。」

上述訪問內容信不信由你......

至於少爺占受訪時就比當奴更加「正經」和「認真」，除披露當奴為了演唱會去了位於深水埗的「new約」排舞，又指是次紅館騷內容，主要是當奴講關於更年期身體和心理問題，充滿學術性。他又提醒入場觀眾：「大家要知道有時標題同入場睇嘅嘢係可以唔同，而且我哋個騷冇演唱會呢三個字，雖然我哋當演唱會宣傳去做。」有指當奴認為他充當mic stand最合適，少爺占毫不介意，「我好樂意，只要個騷完咗，啲錢係平均分就ok，做多做少係冇問題，有時唔可以計較咁多。」

少爺占繼續讚當奴：「我希望大約九成係佢演出，因為佢嘅演唱技巧，好多香港歌星都做唔到嗰個效果，但而家有商品說明條例，個騷有『艾粒』呢兩個字，怕分配唔平均會俾人告，所以我哋嘅演出要50/50。」

台上分工清晰，入場觀眾又要準備甚麼？少爺占呼籲大家：「要準備現金！因為現場好多紀念品賣，我哋會將啲錢撥入『艾粒』團隊，因為搞笑團隊已經買少見少，好似MIRROR明明有啲成員係搞笑，但佢哋都走認真同有型呢個路線，所以『艾粒』係絕無僅有，要保育，用現金維持我哋運作！」

訪問就是在這個情況下完成了......唔該晒！

採訪：鄉奈仁　
攝影：陳慧安
影片：馮嘉銘
化妝：Krisie Wong
髮型：Johny Wu@Hair Corner
場地：六公館@海港城

精選娛聞，喺晒《娛果》
http://fb.com/appledailyent

第二屆最港電影大獎投票網址
https://bit.ly/thekongestfilmawards2018

10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI