熱烈地彈琴熱烈地唱…終於等到徐小鳳開騷喇！久違3年嘅《金光燦爛徐小鳳演唱會2018》，今晚正式係紅磡香港體育館舉行。

演唱會準時喺晚上8：30分開騷，全場爆滿。小鳳姐出場前，有15位着住西裝、拉住小提琴嘅小朋友圍住台邊，之後着上銀白色背心長裙、襯一條銀色閃閃被肩嘅小鳳姐喺台中升上嚟，唱出《神鳳》為演唱會揭開序幕。

到小鳳姐唱《漫漫前路》中段時，佢就同大家揮手打招呼：「Hey，你哋好嗎！」其後佢又用廣東話話：「好多謝各位」，同埋用國語講「謝謝！」到唱出《風的季節》時，小鳳姐到中段仲叫大家一齊唱副歌，在場睇騷嘅歌迷都睇得好開心，大家亦有跟住一齊唱，非常好氣氛。

唱完《風的季節》後，小鳳姐就話：「非常多謝你哋，有成三年冇見，我以為你哋唔記得咗我。」當台下觀眾大叫：「好靚呀！」小鳳姐就搞笑地話：「我梗係知道啦，有時靚到都唔敢照鏡，怕照爆鏡。」而佢亦有向觀眾介紹剛才在台上拉小提琴嘅一班小朋友：「多謝呢班第五代嘅音樂人，我今日好緊張，雖然已經唱咗好耐，但每一次見你哋心情都好激動，我游水游得好辛苦先游到你哋身邊。」之後佢就唱出《深秋立樓頭》、《流下眼淚前》及《隨想曲》，唱完後小鳳姐就表示好熱，之後佢就除咗件被肩話：「有無人幫我執咗佢。」台下有男觀眾上台獻花，小鳳姐笑話：「唔該晒你，又要買飛、又要拍手、仲要幫我執嘢，咁多年嚟聽我唱歌委屈你喇。」講完後小鳳姐突然話想飲水，飲完台邊工作人員遞上嘅水後，小鳳姐又話：「咁苦嘅，苦過我條命呀！」而小鳳姐唱到第10首《飛沙風中轉》嘅時候，就換咗件桃紅色晚裝裙出場，閃爆全場。

精選娛聞，喺晒《娛果》
http://fb.com/appledailyent