擁有一架落場版賽車，相信係唔少愛車之人嘅夢想，不過有時有錢亦未必可以買到心頭好。就好似FordEscortRSCosworth嘅WRC版咁，就係只作賽事用途而不公開發售嘅辣車，就算有錢都買唔到。雖則話買唔到，但唔代表無可能擁有，呢個世界就係有人為咗心頭好而不惜一擲千金，豪花70萬將227匹嘅街車版Escort改成500匹嘅WRC版！
據負責呢個希望工程嘅改車專門店MTMotoring負責人阿Ben講，成個工序根本就同重新造架車出嚟無分別，因為部車由車身、引擎、波箱、制動、懸掛、排氣，以至行車電腦都要全部改過晒！

車癡勁改F1電腦

先講車架，除咗加焊強化車身、加裝防滾架外，仲要偷輕車身，頭冚、尾翼及沙板等全部改用碳纖；引擎係WRC規格，2,000c.c.4氣缸（每氣缸有兩個噴嘴），馬力最高去到500匹，再加埋可縮短TurboLag嘅無燃點火系統、提升起步速度嘅防滑系統等等。電腦方面用上F1賽事所採用嘅StandaloneECU，裏面嘅程式亦係由世界房車賽工程師所編寫；採用5前速Sequential波箱，好處係上波唔需要踩極力子，另外亦用上APRacing出品嘅制動、JRZ避震、排氣喉換上Inconnel材料，重量輕一半之餘仲更耐熱！
架車改到咁堅，唔落場就真係嘥料喎！不過對唔住，原來車主無打算用佢嚟落場，只係純粹用嚟平日代步。所謂車癡，咪就係呢啲囉。

記者：周達之