當年今日
關於我們

四太梁安琪 話超欣未係時候拍拖

蘋果日報 2013/12/13 06:00


賭王何鴻燊四太梁安琪噚晚出席喺澳門搞嘅慈善拍賣晚宴,啱啱落機嘅何超欣亦趕嚟撐場。

四太喺現場話:「每年做呢樣嘢,係秉承何博士回饋社會嘅心思,當然希望善款數字每年都增加!」四太話未見到超欣,原來一落機即刻趕嚟,見到超欣大個咗好多,四太話:「人總會長大,好似我哋都會老,不過拍拖未夠時間,歲數都咁細個,讀吓書先喇,要有啲有人生經驗。」佢仲話:「對我嚟講就想細路仔快啲大,學業有成,早啲出社會打滾,學多啲嘢,有能力為社會作出更大嘅貢獻。」至於會唔會想超盈幫佢手,四太話:「做父母嘅梗係想,但係要睇吓佢想喺邊方面發展,佢喺設計呢方面比較有心得。」