伊拉克愛國游擊隊經我國政府透過友好渠道溝通，終於發現綁錯好人，毅然改正錯誤，將我方七名勞工釋放。國家顯示綜合國力，能人所不能，正如毛主席教導：「誰是我們的朋友，誰是我們的敵人？這個問題是革命的首要問題」，祖國支持侯賽因，擁護拉登，若然咁都受到伊拉克愛國游擊隊懲罰，試問點樣教導下一代，乜嘢叫啱，乜嘢叫錯。
今次得到真神阿拉及鄧公在天之靈聯合保佑，兼伊拉克臨時管治委員會根據鄧小平原意，尋求可蘭經釋法，終於擺平一宗糾紛，呢七名福建勞工雖食豆食着屎，直頭可以提名競選諾貝爾和平獎。
特區呢一邊，就依然亂過巴格達。特首阿董及政制搞笑三人組民望齊齊下跌。阿董民望跌，經已唔係新聞，最可惜嘅就係聲稱「流香港血、飲香港水」嘅當奴。
不過唔怕，AO小圈子耳語：當奴份人好清醒，佢極為重視個人嘅清譽，唔會任由自己民望下跌。今次佢搶閘在中方釋法之前，先飛身肯定「○七○八選舉有必要修改」，搞到啲土共社團，事後狂補飛，猛喺親中報章登廣告話反對○七○八政制變動，都係浪費廣告開支兼報紙紙張油墨，呢一招搶先洞房搞大肚，好似牧牛童咁，一吓快手扯住隻儍牛個鼻環，拉佢去咗自己想去嘅嗰邊，當奴不愧官場老手，呢嘢盡顯政治智慧。