唔知南韓教練軒迪克係咪俾勝利沖昏頭腦,家吓佢隊波都未知出唔出到線,但佢就好大口氣咁話,唔怕喺十六強對意大利。
雖則南韓家陣手執住四分,但係個形勢就唔係太好。事關佢哋如果喺最後一仗輸咗畀葡萄牙,而美國又和咗波蘭嘅話,咁就要返歸。雖然係咁,佢哋教練軒迪克對出線仍然好有信心,重話就算喺十六強對意大利,亦都冇有怕。
我求大俠亦認同做人應該有信心,但係軒迪克畀咁大希望啲南韓人,如果佢到時做唔到,因住由高麗英雄變咗狗熊。
丹麥計數據易攞冠軍
丹麥同法國過去四次(唔計今次)喺大賽碰頭,贏波嗰隊最後會成為冠軍,所以有人話丹麥前日贏咗法國後,應該可以成為今屆世界盃冠軍。但我求大俠就唔係太認同,事關以丹麥𠵱家嘅實力,喺十六強對住英格蘭,贏面都唔高,咁又點攞冠軍呀!
簡尼基亞搵人頂包失敗
阿根廷前鋒簡尼基亞認真離奇,喺今屆世界盃冇踢過一場波,就俾球證趕咗出場。事關佢老人家喺噚日對瑞典場波,完半場前喺後備席上鬧球證,結果就換來一面紅牌。雖然阿根廷有位職員諗住博懵自己行出場,但球證就冇俾佢呃到,最終簡尼基亞死死氣都要行出場。