中原老闆施永青推崇道家思想，好多人都知，佢重話老子個套唔單止適用於管理文化，用嚟睇樓市一樣掂。施老闆日前出席一個道教文化展覽會，就講到地產市道興衰，同老子嘅「物壯則老」論如出一轍。
施老闆話按老子嘅講法，萬物走向極端都會調翻轉頭，所以樓市喺97年高位滑落，係好自然嘅事；而近期樓市大漲小回，亦與天道一致。不過，施老闆就叫大家唔使太悲觀，因為按另一句俗話「有咁耐風流，有咁耐折墮」分析，樓市自97年以後，足足「折墮」咗6年，03至04年先叫做反彈番──數數手指，大家應該重有段時間「風流」；加上預期明年人工仍然有得加，市場積存一批購買力，所以佢展望樓市整體都係樂觀。
風趣嘅施老闆又引用《道德經》嘅「聖人執左契，而不責於人」，贈畀出席同一場合嘅恒地營業部總經理謝偉銓，佢話𠵱家發展商賣樓，吓吓食盡價位，些少都唔留番畀啲炒家、投資者，長此落去，重邊有人有興趣陪發展商玩呀？唔知謝先生聽完，會唔會重新執過西灣河嘉享灣份價單呢？

謝總收到冇？

講番呢個由金蘭觀主辦嘅「道貫真源」道教文化展覽，喺中環科達中心舉辦，展期到6月6號，場地係由科達免費提供。科達主席湯君明話，金蘭觀喺屯門山卡啦嘅地方，冇乜人識，所以集團借出場地，等多啲人容易接獨呢個宗教。不過，佢話自己屋企係信佛嘅，但唔覺得幫道教推廣有咩問題。
電郵地址：[email protected]