近日聽聞，受到全球暖化、環境開發影響，澳洲樹熊可能喺30年內絕種。即使真嘅澳洲國寶將來消失，他日仲有假嘅頂上；只要澳洲搞多啲體壇盛事，好似澳洲高爾夫球大師賽咁，吸引觀眾化身樹熊爬上樹睇活士比賽，邊使驚「國寶」會消失？所以話，有「老虎仔」就有「樹熊」。
今次係活士11年嚟首次喺澳洲作賽，久旱逢甘露自然掀起老虎熱；4日比賽共10萬張飛開售幾粒鐘就被搶購一空，而淨係計禮拜二佢練波，就已經吸引約7,000人嚟睇。好喇，到噚日朝早正式比賽，據講逾兩萬持票人士湧去墨爾本KingstonHealth賽場，搞到附近大塞車，連活士自己都不能倖免，差啲唔能夠準時比賽；呢個場面，甚至連大滿貫比賽都唔係時時有。

賽場內早變成動物園，一早已有「老虎仔」粉絲好似等睇心愛動物咁守候一旁，每個球道兩旁至少都有三層人群重重包圍；有人着住「Tiger」字樣嘅衫捧場，更有人大玩cosplay，以一身老虎打扮示人，都係為博活士一笑。
咁都唔算誇張，有啲索性爬上樹霸定靚位，呢啲咪叫巨星魅力囉！好彩大會為免觀眾影響球手比賽，唔准影相，否則肯定更混亂。
眼見咁多粉絲為自己着迷、瘋狂，活士呢位14個大滿貫得主好識做，首日賽事表現賣力，總共打出7隻「小鳥」，以低於標準桿6桿嘅66桿成績，同東道主球手尼迪斯、南非球手格斯一齊以一桿優勢力壓群雄領先。「老虎仔」威就攞晒，但錦標能否袋袋平安就言之尚早囉！