沈殿霞日前由於喉嚨發炎,所以原定在灣仔演藝學院演出《麗花皇宮2003》舞台劇要臨時取消。前晚肥姐的病情已好轉,故繼續如期演出,而凌波則出任表演嘉賓,其丈夫金漢亦有捧場。
毛毛暖水袋取暖
肥姐前晚已可開聲唱歌,不過演出完畢接受訪問期間,則要攬着一個毛毛暖水袋取暖。提到病情時,肥姐說:「我因為感冒引致喉嚨聲帶發炎,之前我咳得好犀利,啲痰都湧住出嚟,把聲又沙,我都唱唔到歌,自己又咳到標尿,封晒喉,我又唔想觀眾入場睇少一部份,先至決定取消演出。」
肥姐表示自己患有糖尿病,所以醫感冒比較困難,她說:「我又唔可以打針,因為打啲類固醇入身體會令血糖上升,如果服藥份量過重又會令胰島素分泌出問題,所以醫生都好小心處方。」
憶羅文感觸落淚
此外,每當肥姐演出其中一幕提到已故好友羅文,都不禁感觸落淚,她說:「其實囡囡欣宜都有打過長途電話問我可唔可以演出,我都唔想囡囡同媽咪太擔心,𠵱家情況都可以。」
肥姐透露日前取消的一場《麗花皇宮》舞台劇,將在本周三(二十九日)補演,而該舞台劇亦會在新年加演九場,肥姐說:「假如到時我重未病好,我或者會推遲返加拿大休息嘅期,因為怕感冒唔清,上飛機耳膜會痛。」
採訪、攝影:馮美茵