韓國女團TWICE嘅台灣成員周子瑜雖然周身唔得閒，又要讀書，又要忙於組合嘅工作，不過青春就係佢最大本錢，噚晚6點半之嘛，佢就同粉絲玩驚喜，喺TWICE突襲演唱會開騷前4粒鐘，先公佈舉行場地係首爾麻浦區。雖然時間有啲趕，但粉絲為見偶像一面，點都仆到去，結果有超過800粉絲到場支持TWICE，氣氛十足開Party一樣。

TWICE喺1粒鐘演唱會上唱咗8首歌，仲同粉絲大合唱，成員多賢說：「冇粉絲就冇TWICE，我哋要一直走到最後。」而子瑜亦表現落力，露腰晒腿又跳起擺出多個可愛動作，令粉絲冧爆。多得TWICE谷一谷，佢哋首新歌《CheerUp》又攞咗音樂節目《人氣歌謠》嘅冠軍歌。