史卓豐非能令我感覺安心的騎師，屬波動性大一類，落場跑馬，不時都有令人唔鍾意騎法，尤其是騎熱門馬。

不過，明日（7月1日）睇見佢手馬，由三場「大爆發」開始數，「快利」、「榮冠大道」及「金太陽」均屬贏得的馬，希望唔會令人失望吧！

第一場四班草地1200米：買Q範圍不闊，心中只存在「魅力之子」、「正是你」、「開懷大少」、「印印腳」及「暴風俠」五駒。

新、舊混合，未跑過的「印印腳」，自5月跟進至今，雖覺小動作多、唔規矩問題仍有，卻感受到其狀態進度持續在提升，最近三課大閘都有戴面箍試，總覺令其唔自在，與無戴有點唔同。

今次落場無用效果欠明顯配件，或更有助交出正常水準，睇過晒外地、本地試閘，可以肯定質素超群，初出跑1200有1檔，已覺有贏面。

另一質新馬跑過一場的「開懷大少」，身、色都未靚，上仗末段追勢極強，乃強勢的第五，賽後復課亦有進，換李寶利續跑同程，亦可博進步。

「暴風俠」也新，不過算較有證明，目前情況有點尷尬，跑1200嫌被動，1400未夠氣兼對手強，不過以上次第三水準，套落此組亦夠用。

稍舊的「魅力之子」，四班用見習生減磅，夠惡，可惜出閘反應時快時慢，談不上穩健。「正是你」粗身，越跑越輕身上力，3檔前置博賺偏差，也有得諗。