哈利卡尼周三對多蒙特場歐聯射入兩球，幫球隊全取三分，賽後好多人都讚卡尼射術世界級，已經可以同唔少歐洲頂級射手相提並論。不過，曼聯名宿菲臘尼維利就話熱刺配唔起卡尼，叫佢快啲離隊。

「如果佢要成為羅拔利雲度夫斯基呢種類型嘅射手，咁佢就要離開熱刺。」菲臘佬咁講：「如果熱刺只係維持想爭前四，咁唔夠好，卡尼甚至係可以競逐金球獎嘅球員，佢需要經常出現喺歐聯賽場，而熱刺只係一支邊緣球隊。我覺得直至佢去到皇家馬德里或巴塞隆拿，咁先可以證明到佢係世界級水平。」

哈利卡尼喺八月時陷入球荒，去到九月突然回勇，連同為英格蘭踢世盃外圍賽嗰段期間在內，四場入咗六球。