連詩雅（Shiga）、鄭融噚晚喺旺角麥花臣場館舉行一連兩場演唱會，有鍾舒漫、鍾舒祺、鄭欣宜、方皓玟、Dear Jane、丁子高等捧場。Shiga緋聞男友徐浩係今次嘅樂手成員之一，成晚喺台上負責彈結他。

兩女以一黑一白造型現身，鄭融着黑色see-through透黑bra，Shiga就露腰騷長腿，一嚟就勁歌熱舞，扭腰趷籮，不過Shiga跳舞明顯生硬啲。當佢哋互相介紹對方，Shiga即刻解釋：「跳舞唔係我強項，同鄭融排舞時，你都好包容我。」呢個時候，有fans喺台下大嗌「連融」，鄭融笑住話：「Hi，係呀！我哋係連融組合。」

鄭融同觀眾talk時，Shiga就喺台上換衫，佢除咗件白色面衫，露黑色bra top，谷微波，再着黑色see-through外套唱歌。鄭融接住唱咗Shiga嘅《到此為止》，可惜甩咀，唱完即刻向原唱者Shiga耍冧，然後話：「我對Shiga呢首歌好有共鳴，好多謝佢今晚畀機會我唱。」

佢哋合唱方皓玟嘅《你是我的傳奇》時，鄭融又再甩咀，唱完即刻同台下fans講包容，鄭融道歉：「唔好意思，好耐冇喺舞台同大家見面，今晚有少少緊張，但緊張唔係借口。」

去到尾段介紹樂隊時，Shiga多謝緋聞男友徐浩，但徐浩勁cool，掛住整理器材，冇望過對方一眼。跟住到鄭融獨唱後，講到自己嘅心路歷程：「入行13、4年，一直好順境、從來唔諗過自己會有逆境，點知幾年前就面對人生嘅低潮，連我自己都容不下自己，逼自己埋死角。從來冇諗過人生係咁痛苦，覺得唔值得人哋讚，直情覺得不如匿埋唔好唱歌，好彩出街遇到好多天使，的士司機、街上嘅姐姐都問我幾時出歌，畀好多動力我，令我冇放棄自己嘅歌唱事業，好多謝大家。」

完騷後，Shiga同鄭融接受訪問，鄭融即時反問記者：「頭先有冇聽到啲咩？」記者話聽到佢甩咗兩次咀，佢即大方承認：「係呀，其實好多人都好鍾意呢首歌。我都冇諗過可以喺度唱到，難得佢大方割愛，綵排時唱得好投入好滿足，可能頭先唱得太投入，我聽晚一定會唱得好啲。」

Shiga就自稱4日瘦咗4磅，本來操到啲肌肉同線條，結果打回原形，佢再話：「呢個騷好難忘，宣傳期開始我同鄭融都成長唔少，大家熟習對方。」問到同徐浩同台係咪仲難忘，佢即否認：「唔係喎，我覺得難忘係因為有阿融陪我之喎。」頭先介紹樂隊時，佢望都唔望下喎?Shiga就話：「吓？咁要咩反應，我都冇望佢。」