當年今日
關於我們

【睇通睇透】第五班「馬王」 終於納入正軌(魯賓遜)

蘋果日報 2018/03/22 23:59

第五班「馬王」吉利馬王魯賓遜睇通睇透

今個馬季將近完成三分二,從近期賽事的戰況及賽果來看,已經開始呈現季尾現象。
首先,賽事步速普遍偏慢,皆因馬匹的新鮮感及火氣大減,前段落腳會較慢,一些在季初賽事擺前走的馬,現階段前段速度已經唔夠快,好似「紫電明珠」季內跑得多,近兩仗都已經失去前速。
另外,近期亦好多處女馬變身跑得好,如在五班爆冷贏馬的「千金一諾」及「架勢堂」,而呢類馬通常欠缺賽績支持,但賽前操練正常,狀態亦有作戰水準,而且在路程場地或騎師方面都會有變數的,這反映了幕後求變搏有突破的決心,戰意肯定會好。
周日(25日)第一場五班泥地1200米,有四駒初跑此程,其中高伯新馬房「吉利馬王」甚有睇頭,此駒體重雖然超過1,100磅,但體質較弱,不利勤拼。
去年11月轉到高伯新馬房後,練者操練對症下藥,晨課以踱步和慢跳為主,大前仗轉倉初出跑谷草1200米,表現突如其來跑得好,後上只輸短馬頭屈居亞軍,而最近兩仗跑田草亦輸唔遠,直路衝刺有勢,四歲馬進度納入正軌。
今次轉爭泥地賽,雖然血統上根據不多,但此駒在3月13日試1050米泥閘,沿途居後甚走外叠蝕位,直路按實亦湧上前,睇走勢絕對合跑泥地,而且狀態相當理想,泥地性能已試準。
今場只負117磅,絕對有條件爭勝,如成為半冷門,獨贏及位置值得考慮。