韓國天團BIGBANG嘅成員相繼入伍當兵，噚日新婚人夫太陽入伍後，下月踏入29歲嘅大成今日亦緊接入伍，於江原道華川郡第27師團必勝部隊新兵教育隊報到，預計於明年12月12號退伍，而BIGBANG僅餘下成員勝利尚未入伍。

必勝部隊主要任務為防守中部戰線，由於部隊所在嘅華川郡嘅地形問題，所以新兵訓練比其他部隊更為嚴格，據悉當其他訓練所新兵只需接受5周基礎訓練，必勝部隊嘅新兵就要接受7周基礎訓練，直至2014年起先改返做5周。

而演藝圈中亦有不少男星曾於必勝部隊服役，包括韓劇《七日的王妃》李東健、男團god成員金泰宇、韓劇《浪漫醫生金實福》韓石圭、韓片《與神同行》劉俊相等，最為人熟悉嘅就係童星出身、韓劇《君主－假面的主人》嘅俞承豪曾擔任必勝部隊嘅射擊訓練助教。

更多韓流，喺晒《娛果》
http://fb.com/appledailyent