《珍珠港》（Pearl Harbor）、《妖夜尋狼》系列（Underworld）女星，43歲嘅姬蒂碧金素爾（Kate Beckinsale）最近被影到同新歡當街激嘴，對方仲係21歲嘅小鮮肉男星麥特萊福（Matt Rife）。計起上嚟姬蒂仲大過麥特媽媽兩年，真真正正係驚世脫俗嘅母子戀！

英國女星姬蒂碧金素爾因《珍珠港》一炮而紅，曾經同前男友米高辛（Michael Sheen）育有18歲嘅女兒，2004年同《妖夜尋狼》系列導演連韋斯曼（Len Wiseman）結婚，不過舊年對方就申請離婚，仲要求姬蒂俾贍養費，兩人離婚手續仲未完成。

周三晚，姬蒂被影到同21歲嘅男星麥特激嘴，麥特托住姬蒂塊面係咁錫，初時姬蒂都有少少尷尬，試過擰轉頭，不過對方追住再嘴，盛情難卻下姬蒂就甜笑回吻。

據美國《Entertainment Tonight》報導，佢地經朋友介紹認識，好快就打得火熱，姬蒂唔單止唔介意對方年齡，反而仲覺得佢幾成熟！21歲嘅麥特萊福係一個喜劇演員，亦係talk show主持人，唔單止靚仔，仲一身肌肉，難怪「媽咪」姬蒂都迷上佢。