今朝（11日）有黃雨警告，晨課一度要暫停，天文台預報會持續落雨。

通常遇着天氣變化，泥地會出現兩個極端，一是實如石頭般的硬地，二是多水氹，舉步維艱的爛地，依上次5月8日全泥宴的相同情況來講，預計聽晚（12日）場地會以前者居多，當晚有五匹放頭馬贏，可作參考。

第一場四班1650米：「黑馬王子」退出買少見少只有八夠列陣，抽1檔的「榮冠大道」理應可守靚位，當然要考慮上仗跑2200米，今戰大幅縮程跑一哩，前段能否把握優勢跟前走。

「榮冠大道」今季八戰，只有上仗跑第二，之前表現平平無奇，主因狀態未弗過，一直寓賽作操兼減分，又不斷在從化、沙田上上落落，直至最近兩個月才穩定在沙田操練。

上仗潘頓跑至一絕，無奈遇着路程專家「文武傳奇」，但已彈離主馬群個多身位，屬高水準演出，拼後隔日已露面踱步，季尾階段保持正常運動量就夠。

「榮冠大道」贏泥地起家，6月尾有場四班2000米唔等，專登揀泥地上陣，在今場弱組賽事，可優先留意。對手當然要留意「正時機」，跑夠落班用潘頓，所有動機都正面。

第六場三班1200米：個人必定會秤「地大大」行先，2號馬實際只孭119磅，本身跑法機動，未必需要搶放，可以守二、三位，在臨場太多不明因素之下，有以上優點已具備贏馬條件。

「地大大」近四戰兩冠一亞，上名俱在泥地同程取得，篤定唯一出路，上仗跑草地立即相形見拙，敗績可以抹去。

秤「地大大」前仗排1檔，起步夠快唔搶守四、五位，轉彎才慢慢郁手，入直路移出三叠望空衝，陳嘉熙左右分韁想抽鞭之際幾乎跌鞭，最後50米才打兩鞭便彈甩對手，做錯所有動作都輕鬆贏馬，可想而知有大把在手。

再睇今場快馬唔多，「地大大」大可守在「快樂旅遊」外側第二位，末段一衝而過直奔終點，最理想不過。

配腳方面「龍城猛將」曾短暫缺課數天，但之後快跳、試閘、剛周日（9日）朝再彈400米細閘，強配雷神，來勢洶洶。

-----------------------------
【新聞有價】6月17日起 繼續撐蘋果
http://bit.ly/2IJ24ZR