【李八方online】何君堯陸頌雄同肥彭合照 黃之鋒暗寸:干預香港事務
黃之鋒何君堯李八方ONLINE彭定康陸頌雄
立法會議會聯絡小組嘅「西敏寺公務訪問團」前日起程到達英國後,唔少參加呢個團嘅議員都喺Facebook分享行程。噚日其中一個活動,就係同「英國議會跨黨派中國小組」(All-Party Parliamentary Group on China) 會面。參與呢個會議的教育界議員「葉Sir」葉建源就透露,好難得身為上議院議員嘅前港督「肥彭」彭定康抽空參與會面,「葉Sir」仲上載咗一班議員同肥彭的合照,當中見到過去批評肥彭干預香港事務嘅工聯會立法會議員陸頌雄,以及質疑過肥彭為「港獨」護航另一議員何君堯,睇嚟兩人都有份同肥彭開會噃!
其實唔少議員同肥彭後,都有喺Facebook分享咗同肥彭合照,包括會計界議員梁繼昌、自由黨鍾國斌等,何君堯同陸頌雄兩人雖然出咗名鍾意玩Facebook,但就唔見有上載同肥彭嘅合照。經常畀建制派老屈勾結外國勢力嘅香港眾志秘書長黃之鋒,今日就喺Facebook「曲線」暗寸兩人:「何君堯和陸頌雄此等愛國愛港議員,竟然跑到英國企圖攪局,聯同前港督彭定康指手劃腳,與英國國會議員討論一國兩制,明顯干預香港事務!」
何君堯噚晚喺自己Facebook直播就話,肥彭會上關心香港情況,但只係「一般門面功夫」,話會上表明不支持港獨嘅肥彭,有問議員點解香港會有港獨出現?何君堯話佢喺會上引述加拿大菲沙機構(Fraser Institute)公布嘅調查中,香港係最自由、開放同安全嘅城巿。八方睇返資料,其實加拿大菲沙機構公布的全球人類自由指數調查中,香港「個人自由」逐年滑落,由2016年的第19名,跌落至2017年的第26名,唔知會上又有無議員提過呢?
工聯會陸頌雄喺Facebook貼出一張與彭定康及其他英國國會議員的合照,語帶幽默說,「肥彭你好嘢!我叫你少管閒事、管好自己個國家先,你竟然搵人圍我?」陸為相片寫下設計對白,將「陸頌雄,你已經被我同我啲分身包圍了!問你怕未?」一句,設計為彭定康的對白。陸頌雄為其他英國議員改名,將他們命名為「彭定康00001」號等,然後自己喊「救...救命呀!」,整張圖題為「突發,陸頌雄俾彭定康圍」。
過去批評肥彭干預香港事務嘅工聯會立法會議員陸頌雄,以及質疑過肥彭為「港獨」護航另一議員何君堯均與彭定康合照。